Førre veke skreiv me at Red Dead Redemption 2 og Red Dead Online får støtte for «DLSS» frå Nvidia. «DLSS», eller «Deep Learning Super-Sampling» er ein teknikk for å oppskalere oppløysinga i spel ved hjelp av maskinlæring. Teknologien har fått ein del pepar for å vere litt for utydeleg i rørsle, men dei siste versjonane har blitt langt betre.
I fleire spel er det veldig vanskeleg å sjå forskjell mellom «DLSS» og vanleg 4K-oppløysing, samstundes som du får langt høgare biletefrekvens enn i full oppløysing.
No har skjermkortselskapet dratt sløret av kor mykje betre yting dei med skjermkort frå Ampere- og Turing-arkitekturen faktisk får.
Opp mot 45 prosent auke
Red Dead Redemption 2 er eit veldig krevjande spel å køyre på PC, og berre dei aller kraftigaste skjermkorta på marknaden har vore i stand til å køyre det i 4K med alle innstillingane på høgaste nivå.
Nvidia skriv rett nok berre om «Performance Mode» i pressemeldinga som kom i dag, ikkje «Quality Mode». Der må ein nok vente noko lågare resultat.
Med «Performance Mode» kan eigarar av RTX 2080 Ti, RTX 3070, RTX 3070 Ti, RTX 3080, RTX 3080 Ti og RTX 3090 kose seg med gjennomsnittlege biletefrekvensar over 60.
RTX 3080 Ti oppnår ein gjennomsnittleg biletefrekvens på 85.3. Det er ikkje opplyst om dei brukar det innebygde benchmarkverktøyet for testane, men då kan ein nok trygt anta at det ligg langt over 60 i «Quality Mode» òg.
Alle RTX-skjermkorta skal no klare å oppnå ein biletefrekvens over 60 i 1080p, medan RTX 3060 Ti og over klarar det i 1440p i «Performance Mode».
